om awighnam astu
Nihan lwirning bhama kretih, nga, yania harep hanyimpen salwiring wawangunan, parhyangan, pakarangan.
Ri tkaning padewasania, wenang mecaru rumuhun, antuk ayam brumbun, olah dadi 33 tanding, genahnia hamanca desa. mwah pakala-hyangan, lwirnia; sesayut durgamala, prayascitamala, katur ring sang hyang bhuta bwana mwang segehan agung saha tetabuhan katur ring sang hyang bhuta dengan.
Wus mangkana, raris tebehin sukat, hanutakna ring hasta kosali, wenang dasarin dumun hantuk batha bang marajah mapinda bhadawang-nala, masurat AM.
Iki rupania:
masusun kalungan nyuh gadhing, makasturi, bwangen toyania, masurat ONG. Dagingin wangi-wangi, lengawangi buratwangi, dedes, mwang kwangen keraras majinah 11, winungkus dening wastra petak, iniket dening lawa petak warna, mapusak antuk kawangi majinah 33 manut huriping bwana, canang satangkep, tumpeng bang hadanan, iwak ayam mapanggang, saha raka den agenep, raris pempen sami, nanging prayascita dumun.
Kuwubang babaturane, karyanang bangbang dumun, marpat, raris margyang pangupakarane, pamyak kalane, jugjugin antuk keris, carita lanang, miwah carang dapdap, kedukin antuk cawan sutra, reresikin, helisin, lukat antuk bhumisudha, girimanca mwang sarwa balikam, siratin tirtha pabresihan den ing soma-gangga.
Ring luhuring bangbang, ngadegang sanggah surya, ring sanggah munggah banten pemakuh, lwirnia; daksina 1, pras, sidahan, putih kuning, mabe tutu, mahukem-hukem, raka geti-geti, lenga wangi, burat wangi, panyeneng 1, arthania 127, magenah ring dhaksina.
Sang hadrewe wawangunan kabeh, yan pahumahan mwang sanggah kabuyutan, pura, salwiring pralingan dewa wenang ngabakti rumuhun ring hareping bangbang, ngabakti ka pratiwi, ngacep sang hyang lemah, sang hyang ayu, mwah sang hyang anantha bhoga.
Mwah ngabakti marep munggah, ri sang hyang akasa, ngacep sang hyang siwa sunia, sang hyang bwana kamulan, sang hyang prajapati.
Wusnia ngabakti, pulang kwangine ring bangbange pinaka dasar.
Wus mangkana, pulang tumpeng barake, tetehin antuk batha bang merajah, susunin antuk kelungan nyuh gadhinge, raris urugin akedik.
Luhur punika, malih dagingin batha bang masurat dasaksara, iki ya:
Luhur batha bange madaging batu bulitan marajah tryaksara, iki ya: AM, UM, MAM.
Luhur batu bulitane, kwangi 1, majinah 11, marajah ongkara mertha, iki ya:
Raris urugin asahang. Mangkana kramania yan sira niti kramaning dadi, haywa hima, tlas.
Iki ling ira BHAGAWAN WISWAKARMA, pangalihan karang, anggen karang pahumahan, mangda tan kabheda – bheda dening lara kageringan, helingakna padhartania, lwirnia:
Yan hana karang tegeh ring paschima, hayu nga, nemu labha sang ngumahin.
Yan hana karang seng ring utara, hayu ika, sawetuning anaknia, petunia tan kurang bhoga sang ngumahin.
Yan karang hasah natarnia, hala ayu kejarania, tan kurang pangan kinum sang ngumahin.
Mwah yan ana tanah bang halus, mahambu lalah, hayu sinia kadhang warga nga, tekeng anaknia manemu hayu sang momahin iriya.
Yan tanah selem magoba hucem, mahambu panes, haywa ngumahin.
Yan hana tanah mahambu bengu, halid, hala dahat, haywa ngumahin.
Malih karang ne nyakitin, yan ana karang tunggal pameswan, manyalengking nga, hala.
Yan karang tumbak jalan gde, hala nyakitin, karubuhan jalan nga.
Yan karang tumbak rurung, sandang lawe nga, gering maderes.
Yan karang singkuhin rurung mwang hapit jalan, kutha kabhanda nga, hala.
Mwang yan ana umang nanggu, nora matabeng umah di harepe, hala dahat.
Yan karang saling suduk papagerania, suduk angga nga, hala.
Yan ana wang matunggalan sanak, mangapit jalan umahnia, sang tunggal bhaga purus, sandang lawang nga, hala dahat sang momah iriya, amada – mada bhatara nga.
Yan umah mapemeswan dadwa, hala dahat, boros wong nga.
Mwang ne tan wenang genahin umah, lwirnia karang wit pura, wit ibu, wit sma, pabajanga, wit payadnyan sang brahmana, karang lebon amuk, tan wenang genahin umah, hala dahat
Iki PANGAWAS CAHYAN KARANG mwang KHAYANGAN.
Yan dhem-dhem renteb hinang katon (katonang), dewa ngukuni karang ika, tan kurang pangan sang ngumahin.
Mwang cayan karang tenget, kerasa ngawang – awang katonang, twi suwung katonang, tri bhuta dengen mangumahin, henggal manemu bhaya sang ngumahin.
Malih ingon – ingon pathikawenang, metu salah rupa, iki cirin gumi rusak.
Muwah karang panes, asu, bangkung, manak tunggal, cirin panes karang ika, wenang hanyut, bhuta salah wetu nga.
Mwanh bhumi sayongan, katiban kuwung – kuwung, panes bhumi ika.
Muwah ring pakarangania metu kukus, panes karang ika.
Muwah karang tumbak rurung, tumbak jalan, tumbak tukad, manamping marga pempatan, namping pura, namping bale banjar, makadinia ngulonin bale banjar, panes karang ika.
Malih babi baberasan, satha asaki ring salu mwang tabwan ring pakubonan, lalipi masuk ring pakubonia, panes kawang ika.
Muwah pakubonia, yan puhun lakare taler kari hingangge, pade cacade lawan naga sesa, tan pegat milara.
Muwah yan hana bale pungkat malih jujukang, sajawining gebug lindu maka bhumi, pada cacade ring bale puhun lakare.
Muwah yan ana bale masu adegania ring lelungane, balu makabun nga, hala.
Yan ana bale materestes bunter sami, cacad, dongkang makahem nga, tan wenang hingangge, hala dahat.
Muwah yan ana bale tarojogan, magerantangan mahileh, cacad,dongkang makehem nga, hala.
Iki PAMANES KARANG salwiring panes, sane ngadakang panes karang, lwirnia, kapanjingan gelap mwang puhun, wenang ngadegang linggih Padma Handap, palinggih Sang Hyang Indra Blaka, tan pegat hamanggih lara bhaya yadin ping dasa caruning tan sidha purna dening caru ika. Apan sang hyang indra blaka dadi sang hyang kala maya dadi kala desti. Mangkana kajarnia.
Mwah yan hana kayu rempak, pungkat mwang punggel tan pa karana, pada panese, tan pegat hamilara.
Mwah nyuh macarang, bwah macarang, jaka macarang, ntal macarang, byu macarang, mwang wetunya kembar, tunggal panese, kadi kagenibhaya nga, panes
Yan hana sanggah pungkat mwah jineng, pawon, pungkat tan pakarana, nwang katiben amuk, kalebon amuk, panca bhya nga, panes.
Yan hana hanggawe pungkate, panes karang ika, kewale cacad, tan kawenang malih ingagge, wenang gentpsin lakare sami.
Muwah yan hana wong mentik ring babatar ing salu, wong bhaya nga, panes.
Yan hana lulut metu ring pekarangan, kalulut bhaya nga, panes.
Yan hana getih kentel ring pekarangan, mwang sumirat ring humah ring pakubwan tan pakarana, karaja bhaya nga. Yan hana samangkana, apang sampunang langkungan ring petang dasa dina, mangda puput macaru, dados caru ika halitan. Yan langkung ring petang dasa dina, hageng nagih caru hika kanget akna.
Yan hana karang katumbak rurung, tumbak jalan, katumbak labak, katumbak jalinjingan mwang tukad, katumbak pangkung, panes karang ika, Sang Hyang Kala Durga hanglaraning, wenang ngadegang padma alit, palinggih Sang Hyang Durgamaya.
Yan hana tabwan sirah, tabwan kulit mwang nyawan, ring salu, ring pahumahan, ring kubwan, pateh panese.
Yan ring lumbung, ring kamulan hayu ika.
Muwah yan hana ingon – ingon, patik, wenang – wenang, salu rupa wetune, panes karang ika, wenang rarung ka segara, tugel gulena, kawandaniya rewekan ring rwi walatung, talining dening budur, bwangen ring payonidi. Raris glarana Panca Tawur.
Yan hana taru salah pati mwang manusa salah pati ring pekarangan, panes karang ika.
Mwah salwiring jadma salah pati, hanuli pejah, sagenah –genahniya pejah, ika tan wenang malih hantuk akna maring pagenahan, hala dahat, hanuli pendhem ring serta, nganut linging sastra bwana purana. Mangkana kramanya.
Mwah yan ngingsirang lumbungmwang dangen, pabrahman kunang, wenang tuntun dening lawe, panyujungniya tari matangis pang tiga, saha banten pangulapan, daksina 1, pras sodayan, hasep menyan astanggi. Mangkana kramaniya. Yan tan tuntun hila – hila dahat.
Iki CARUn HUMAH CACAD, yan hana wang manampih bataturan, gawenan caru, pemangguh Pamali Alit nga.
Lwirniya: iwakniya rumbah gile malih punjungan putih kuning 1, uyah areng, iwak hayam ireng pinanggang, raka nyu matah salirang, sajeng manis mwang daksina 1, katipat kelanan, soda 1. tlas.
Mantrani Pamangguh pamali Alit, caru ika pendhem ring genahe macaru, tlas.
Iki CARU MAWUG HUMAH mwang MAGINGSIR NGARANGIN, maka pangraksaning karang,
sa; daksina 2 gnep, pirak 500 mwah tumpeng poleng 1, mabe taluh, wusniya matanem. Malih tebasan 1, pras 1, tulung 3, wusniya pinangan.
Malih caru getih sapinggan, hati sahundhuh, wusniya hati getih mwang tumpeng matanem ring hareping sanggar kawitan.
Muwah besi hanggen titi ring pameswane, ika henjekin dumara ngawug humahe,
ma; ih sang hyang wariwastu ya namah swaha, ih sang kala naga, sang kala bhumi, sang gumatap – gumitip, ampunana raren ingsun, poma, tlas.
Iki upakaraning PANGRAPUH CARIK, salwiring rapuh ring gaga ring tegal sawah muwah ginawe umah,
lwirniya; sayut 1, maiwak satha putih pinanggang mwang pangambeyan 1 iwakniya bebek putih ginuling. Pabersihan, peras, penyeneng, sagawu tepung tawar lis, mesi daksina 1, katipat kelanan, hajuman putih kuning, canang genten hatanding, munggah ring sanggah cukcuk, katur ring Bhatara Surya mwang segehan 2 tanding, matabuh twak harak berem, nunas toya ka bedugul panguluning sawah mwang ring sang brahmana pandhita, tlas.
Nihan KRAMANING NGEHED SAWAH mwang HANEPAS, NYAPUH PUNDUKAN.
Upakaraniya; pras panyeneng, rayunan putih kuning, bubuh mawadah suyuk 5 tanding, katipat kelanan, pras hajengan santun 1, harta 727.
Malih caruning natar carike, caru bebek selem, holah jajatah lembat asem dadi 5 tanding, ketengan 33 tanding, padha ngawa sengkwi ketengan ika swang, kulite laying – laying, sesantun 1. Pemarisudha dening toya mawadah sangku tembaga, siratakna ider kiwa ping 3.
Ma; om nini pamali wates, kaki pamali wates, tan hana jurang pangkung, aku ibu pertiwi hanglebur salwiring hala, om bhuta asih, kala asih, dewa tka purna, om sa ba ta a i.
Iki CARU PENGASIH BHUTA nga, pamahayu pekarangan, pamahayu sanggar pomahan.
Umaparania, ca, tumpeng putih kuning den agung, hinideran sarwa sekar, rakania putih kuning, canang genten, iwaknia satha sudhamalagrungsang kumatandhang mapanggang, muwah ithik putih ginuling, mawadah dulang anyar, marajah surya candra.
Wus minantra pendhem tengahing natar.
Phalania, yan hana wong hakriya hala, salwiring tuju tluh taranjana, leyak prakasa, bhuta kala dengen, mari denia dewa sih bhuta wedhi. Mangkana kramania, haywa sang pandhita mapi tan weruh sastra iki, apan sinilib se sang hyang licin, nging haja wera, sahasya temen.
Iki CARU PANGANGGIHAN nga, yan ring karang paumahan karasa panes, maka cihna ing karang panes yania; katiben kagringan tan pantara mwang kasusupan dening branti, ngimur – imur kalanan mwang sering kna wicara, manusania tan renga ring gagaman manusa. Yan mangkana cihnania, wenang hacaru ring pakarangan, lwirnia;
ngadegang sanggar tutwan, munggah banjotan kelanan mwang canang lenghawangi, buratwangi, canang gantal.
Ring sor ithik bulu sikep, hinolah hurap bang putih jajatah dadi 33 tanding, walulangnia winangun hurip, hangkebang ring caru ika.
Ring sanggah kamulan ngaturang prayascita lewih malih nunas pakuluh pamuput caru ika.
Ring natar genah carune, madhatenganhayam putih hingolah dadi 5 tanding, saha canang daksina, panyeneng. Di hulun dhatengane, banjotan kelanan, wusan maprayascit ring sanggah raris kepakubonan maprayascita.
Yan wus puput ika, buncal ring pempatan agung.
Iki CARUN KARANG PANES, hapa lwire cihnaning karang panes, gring luminta tan pegat matemahan pati mwang sarwa aksi sathonia tlas kageringan, kweh pejah, wenang caru ika. Glarakna ring pakarangan, mangdane sampurna ikang sarwa magalak ring pakarangan. Lwiring caru,
sa; tumpeeng putih hadanan, iwak satha winangun hurip, jajatah calon rateng tan winalik hanut huriping dina mwang rumbah gile, suruh putih hijo, saha canang daksina, pras penyeneng lis, hartha 225.
Mwah hana papendheman rontal rinajah kaya iki:……………
iki mantrania, ma; pancha bhuta, raksasa raksasi, dustha durjana, henduh ta kita, yan tan kita weruh hamaca sastranku; yan sira tan wruh hamaca sastranku, lunghana kita, yan kita wruh palungha kita, tan wruh yen wruh, yen alumuh lungha kita, panger ngke pangraksante ri ngong, hana tadhah sajinta, pulawa sapunggel, susuruh putih hijo, saga rong penek, hayam winangun hurip, rinumbah gile, sasak mentah, jajatah calon tan winalik, twasanta hangraksa hulun. Tlas.
Wus hangrajah , wus anyaksenana kang caru, pendhemakna rarajahane ring rontal.
Iki CARUN PANGANGIHAN KARANG,
lwirnia; tumpeng 9 danan, iwak ithik bulu sikep, hinolah dena sangkep dadi 9 tanding, kulite laying – laying.
Muwah nasi mapindha wong – wongan, malih nasi mawadah tangkulak, benia getih matah lebeng, segehan agung, masambleh satha ireng, maruntutan pamangguhan agung.
Iti PAMANGGUHAN PAMALI,
lwirnia; caru bulan ring tengah, cawu petik bilang samping (sisi), manca desa genahnia, halednia don byah, beten don byahe klupakan tiying madaging hole –hole, sami porosania don girang, pamornia tahin blek, bwahnia biluluk, plawania lateng hayam, iwaknia lindung, bluwang, kathak, baling, capung, sami maguling.
Iki PAMANGGUHAN ALIT nga, salwiring caru panca satha agung alit, panca klud, walik sumpah, tawur gentuh masapuh, panca wali karma, eka dasa ludra, maligya bhumi mwah salwiring caru, wang hamanak salah ring pemanggahan, ring sawah, ring hulun empelan, ika sami wenang duluran pamangguh pamali, mwang sesayut durmanggala, sesayut panca klud, hanutakna ageng aliting swakarya, wenang lawakna.
Nihan tingkahing karang pahumahan kna gering tutumpur sasab mrana mwang kna pamali pulung, tan pegat kna gering kabhaya – bhaya, lara sang madrebe humah, reh matonya I bhuta jigramaya, rupania hamanca warna, ika retuning kala dengen, mahanak pamali pulung raksa, mahanak I pamali mundar – mandir, kwehnia 11 diri, ika hangadakaken kapanjingan hyang lalah, kasandering glap, katiban amuk, kalebon amuk, katiban lulut, kasiratan rah, mati magantung, salwiring cuntaka bhaya, ika mamirudha nga, ki bhuta jirgamangsa.
Yan kurang pracaru, tan pegat katiban gering, krana wenang carunin sagenah karang ika, lwiring pracarunia;
nasi wong – wongan 5 tanding, marupa manca warna, padha matatakan don byu, mawadah klakat, canangnia hanut nasi wong – wongan ika, kwangen padha masiki, jinah padha 2 sowang –sowang nasi wong – wongan ika, madaging tumpeng hanut warna, sami pada madanan, iwaknia satha brumbun holah dadi 5 tanding, rupania manca warna, sangkwinia 11 bidang, bayuhania 5 wadah, santun 1, bras 2 kulak, hartha 777, genep sahupakaraning sasantun, lis 5 puwun, susunang ring sega wong – wongan ika, ring madya gnahnia.
Malih sega pangkon 1, iwaknia kawisan madaging jajron matah, masusun basa Rajang, mawadah limas andong bang, tok 5, sujang, harak brem padha 5 tekor.
Malih sega pangangon pamali hatanding, nasi takilan mawadah don kumbang, iwak bawi magoreng, trasi bang, yadin alit wenang, sabhagya yan agung.
Malih jumput tanah humahe bilang bucu mwang ring tengah padha ping 3, tatakin don waru padha 3 bidang. Raris genahang ring nasi wong – wongan ika.
Genah caru ika ngarepin pawon, tunasang toya ring sanggah kamulan, toya pangihid pamali mwang sarwa bhuta durgha.
Yen wus puput winastu, geseng tatimpug ika.
Wus mangkana, nasi wong – wongan ika bwangakna ring sagara, ring lwahing nadi wenang, tkaning banten kabeh. Mwah sang gring wehin bubuh tajin, toyanin antuk candana mahasab, raris tunasin toya ring kamimitan sanggah kamulania mangde tan mangkana manih kagringania.
Malih tunasang toya pangentas sarwa bhuta, raris lukat ring pomahania, pasangin pangentas. Ri meh hanganyut banten ika kabeh. PANGENTAS ika kadi pangentas jadma mapreteka, karyanang bubuh pirata 5 tanding, wusing pinuja panglepas, bubuh pirata ika tkaning wulantagania salan – laning toya pangentas, pendhem ring hareping parone.
Mangkana kramania karana manggih hayu sang bhuta kala dengen, tan hana sira malib hanggringin sang momah – omah sakurenania tkaning anak petunia hamanggih dirghayusa, yowaba weta hurip, gring tutumpur punah, leyak mari, bhuta kala dengen hasih, bhakti sahidhep. Samangkana tingkahing carune ring Pabrahman, matemahan hayu sang madruwe umah.
Malih CARUN KARANG KAGERINGAN, karang panes, karang angker, karang aeng mwang sane ngenahin tan pakala miyegan mawyadi, wenang carunin karang ika. Lwing carunia;
syap putih maholah dadi 5 tanding, padha majajatah lembat asem, hurab bang putih sowing, walulange malih winangun hurip, tumpengnia padha madanan, macaru bilang bucuing karang, matanem, layang – layangnia ring tengah tanem.
Yan nora carunin, ngimuh ikang kala bhuta kabeh harep hanadhah manyakitin sang adruwe humah, tan manggeh yasania, rahina wengi katadhah hantuk kalan bhatari durgha, yan sampun tawurin, enak tekang sarwa kala bhuta, matemahan hayu sang madruwe humah.
Iki mantrania, ma; ih Ki Bhuta Jigramaya, marupa manca warna, kita retuning bhuta kala dengen, hamanak I pamali pulung raksa, I undar – undir, eka dasa rowang ira, kita hanggawe kapanjingan hyang lalah, kasandering glap, katiben hamuk, kalebon hamuk, kasiratin rah, salwiring cunthaka bhaya, kapunah den ira sang bhuta jigramaya. Om am ksama sampurna ya namah, sa ba ta a i na ma si way a, om am um mam.
Iki PAMANGGUH PAMALI nga, sane AGUNG.
Sadhana banten 5 nyiru, sega cahcahan 33 tanding nganut pahideran; ne putih, purwa; ne barak, daksina; ne kuning, paschima; ne ireng, utara, ne brumbun ring madya; nganut huriping pancha warna. Mangkana dandanania, raka saka wenang, iwaknia satha manca warna, lis padha mapuhun, malih magawe sanggah linggih pamali mwang baki 5 besik, mahaled klopekan tiying, maplawa rwan tihih, rwan bwah, mabuhu rwan temen, gagirang kayu tulak, rwaning dhapdhap, slepan, matali benang tridatu 5 pesel kwehnia, genahang ring linggih pamaline, genahnia mancha desa.
Ring madya suci asoroh, boki ika madaging tumpeng padha madanan, lwirnia; purwa, putih 2; daksina, bang 2; paschima, kuning2; utara, ireng 2; ring madya, mancha warna 5. Iwaknia manut tumpeng, tatebus mancha warna, kwangen 5, hartania nganut huriping pancha desa.
Mwah hameten clebingkah ring pekarangania, midher mancha desa, kumpulakna ring genahe mecaru mwah mancha desa genahnia, sinurat dening aksara panca brahma; SAM, pur; BAM, da; TAM, pa; AM, u; IM, ma; matorek pamor mah empat, raris genahin ring bokine. Banten ika, matatakan klakat pakideh mwah sengkwi gde, pur da pa u mwah twak den akeh mawadhah kawu mabulu 5 besik, pras penyeneng, sesantun 1, bras sakulak, harta 777, pemarginia ring dina nemu kajeng kliwon ring senda dening hacaru. Wenten mamangguh dumun, mahider mengidul, mengulon, maring tengah. Mangkana tingkahe mamangguh pemali, raris punduhang ring tengah, irika raris sesontengin, malih tunasang tirtha ring panghulun setra.
Iki ngaran PEMANGGUH PEMALI, wenang hangunduraken pamali,
iki pujania, ma; “pakulun pamali, nini pamali, ingsun hangunduraken pamali agung, pasengan i gubar gumi, pramantran i pamali ngaran i guyang hati, prebekel i pemali ngaran i tunjuk hati, sedahan i pamali ngaran i sandi pati, panyarikan i pamali ngaran i tumbak api, kesinoman i pamali ngaran i kuyang – kaying, juru tulis i pamali ngaran i tuwek wesi, bhujangganing pamali ngaran i muyang – maying, juru cendek i pamali ngaran i pundar – pandir, maka dewaning pamali mapesengan sang ratu manjaya, tke madocararan i pamali ngaran i pamali banthang, pamali tunggak, pamali tungguk, pamali tunggek, pamali pacek, pamali jengat, pamali brahma, pamali wisnu, pamali pulung, pamali suket, pamali jlinjingan, pamali tukad, pamali sawah, pamali sema, pamali desti, pamali teluh, pamali moro, pamali hangin. Satus hakutus haraning pamali, tke kita kabeh padha patuh ingkup asanak ring pun anu, sang adrewe caru, puniki hana ganjaran ira katur ring ra kaki pamali nini pamali, pahingkup agung pamangguh agung, ingsun anugraha hamukti sari lawan sanak ira kabeh, weha wedocaranira samudaya, sampun sira malih hanggringin jadma manusane pun “anu” wahana hurip warasa, dirgayusa tkaning hanak putunia kabeh, amukti pwa sira, yan sira wus amukti mantuka sira ri khayanganing sowang – sowang. Ong sarwa pamali pamali bhya swaha, apan aku rumawak sang hyang brahma jati.
Iti SASAYUT PANCA KLUD kawruhakna,
lwirnia; tumpeng poleng 1, makalung maplekir, kwangen 5, padhenglepus 5 katih, muncuk hambengan sahet mingmang 5, nyatur desa genahnia, sisinia medaging penek 5 nyatur desa genahnia, mwang payuk 1 misi yeh misi sahet mingmang.
Mwah pamyak kala, nasi pangkonan mapyak mah empat. Slatin antuk pandan, iwaknia; ne kangin, nyalyan; ne kelod, udang; ne kawuh, yuyu; ne kaja, lele; ne tengah, sandhu.
Iki mantrania, ma: pukulun sang kala purwa, sang kala sakti, sang kala brajamuka, sang kala preta, sang kala ngulaleng, iki tadhah sajin ira, iwak trasi bang bawang jahe mwang hantiga, mwang panca klud, mwang pamyak kala, manawi wenten kurang, iki jinah satak lima likur, atumbasa sari mareng pasar agung, weha sanak rabin ira mwang putu buyut, haja sira usil silih gawe, lungaha sira hamarah marah desa, haja marangke muwah den pada sidhi swaha.
Yan tan harep hanglewihi, sesayut durmanggala, sesayut prayascita, pamyak kala wenang, panca klud, tumpenge poleng ring tengah, iwak trasi bang taluh bukasem.
Iki PRAYASCITA sakalwiring durmanggala,
sa: penek iwak trasi bang bawang jahe, daksina 1, bras akulak, lawe satukel, pirak satak salawe, segaru, tepung tawar, bungkak niyuh gadang 1, lis salepan tan sumalah ring salu, taluh bukasem 1.
Ma: pukulun sang kala purwa, sang kala brajamuka, sang kala ngulaleng, sang kala tamba petre, sang kala sukama, aja sira pati panjingin, patya poporotongi, iki tadah sajinira, pnek lawan trasi bang bawang jahe, hanadhah sira tur lunga, manawi kurang tatadahan ira, maraha sira maring pasar agung, wehana hanak rabin ira mwang putu buyut, haja marangke muwah, den padha hewanaha, raksa rumaksa padha sidhi swaha.
Nihan PAMATUH PAMALI ring pomahan,
sa: kwangen 5 kojong, nasinia hentip, jinah wijinan padha 2, skar patuting kwangen.
Ma: om sarwa dewi broh namah, bhuta yaksa namah swaha, pamali – pamali bhuta – bhuti kala – kali kala dengen, patuh kangin, patuh kawuh, patuh kaja, patuh kelod, patuh ring tengah, padha patuh ingkup, tke patuh 3x.
Yan kita mahyun kinasihaning bhuta, iki PENGASIH DEWA, mwang sarwa Bhuta, tkaning pengasih manusa, hanggen ngabakti ring dewa wenang, masadana candhana janggi, bhasmakna ring slaning lelatha.
Ma : ingsun hangidepana sang hyang tunggal, rumasuk ring sariran ingsun, tri nadhi sama bhaktya, dewa mantara masya, bhuta wigraha masya, manusa sidhya masya, apan aku sang hyang tunggal, amatuhana tri nadi, sing tka patuh ingkup, 3x.
Iki TEBASAN KABUYUTAN LUMBUNG mwang graha, karubuhan taru agung.
Carunia; tumpeng 2, mawak hayam kendhungan 1, winangun hurip, dagingnia hingolah, hurab bang putih, jajatah 9, calon 9, hebatnia linawar bawang jahe kesuna cekuh 11, trasi tinunu, gula wirahan takir, hebatnia suci haywa ngedapin, sajang sagecha, jangan sekawali, palawania sembung, toya ring beruk anyar, tepung tawar, wirantu ring hareping karubuhan, ikang rinubuhan winangun muwah.
ma; Om Sang Bhuta Kulalwing, Sang Kala Bhuta, Sang Kalemang, Haja sira pati papanjingan iki tadhah sajinira, tumpeng hadanan, trasi tinunu bawang jahe bras agenja, lawe satukal, hartha satak salawe.
Wus mimantran, tatebasi kang karubuahn, mwang sang adewe umah.
Ikang caru tinilaring parempatan jalan, haywa tinolih kang tinilar.
Iki PAMAHAYUN KARANG, hawut deniya manggih hayu, caru hangkus, nga,
lwirnia : bubuh pirata, nasi hangkeb, sorohan asoroh, suci satampa, tumpeng 9 besik mewarna 9 mawadah tamas, maraka kadi sodahan, hasubang bungkem 1 dagingniya holah jangkep, walulangnia winadhahan sangkwi mapindha cicing, hinangkeban dening walulangnia.
Malih punyan tiing katut humbinye 4 puwun. Daksina 1, hartha 770, katipat sodahan, katur ring bhetara kala, kasaksenan de Bhatara Surya, muwang watek dewata nawa sangha tumut hyangnia makasami.
Wusnia, pendhem ikang caru, nasi hangkebe lebarang ring jaban pamaswana, punyan tiyinghe, pamula disamping pamaswane, diharaping korine kiwa tengen ring jeroning kori muwang ring jabaniya. Mangkana kramania gnahe macaru ring natar wenang.
Nihan KAPUTUSAN SANG HYANG RESI GHANA, pamarisudhaning karang hangker salwiring panes.
Yan mati salah pati, kalebon amuk, sinambering glap makrana sang adrewe humah kabhaya – bhaya kojarania, caru iki glarakna ring pomahan ring sanggar ring parhyangan mwang ring tegal sawah sagenahing karang panes, aheng mwang hangker, yadnya kapanjingan bhuta kala dengen, umahing dete, caru iki glarakna, lwirnia:
Nanceb sanggar tutwan, munggah suci 2 genep salanlaning suci tkeng rantasania, harta 1700 haja ngelongin. Mwah ring harep sanggare, natarnia marajah padma asthadala maka gnahing caru resi Ghana.
Resi Ghana ika, sega 9 pangkon, wadahnia tamas agung malawa don nagasari, marajah sowang – sowang; OM, Madhya; AM, pur; SI, da; GHA, nai; NA, pa; BYO, ba; NA, u; MAH, aer. Sega ika tinanceban skar tunjung sowang – sowang, iwaknia ithik ingolah den asangkep, nora majajatah.
Caru ring natar, hayam mancawarna, malayang – laying, matatakan klabang mikuh, dagingne olah anut huriping pancawarna, holahnia haywa korup: ne putih kangin, olah urab bang putih, jajatah lembat asem pada 5 katih calon 5 katih dadi 5 bayuh. Ne kelod hayam biying, olah urab bang putih, jajatah lembat asem pada 9 katih, calon 9 katih dadi 9 bayuh. Ne kawuh hayam putih syungan, olah urab bang putih, jajatah lembat asem pada 7 katih calon 7 katih dadi 7 bayuh. Ne kaja hayam ireng, olah urab bang putih, jajatah lembat asem pada 4katih calon 4 katih dadi 4 bayuh. Ne ring tengah hayam brumbun, olah urab bang putih, jajatah lembat asem pada 8 katih calon 8 katih dadi 8 bayuh. Padha matatakan sengkwi, calon mawadah limas maduluran sesayut pengambyan, pangulapan, prayascita luwih mwah tumpeng hagung 1, iwaknia guling ithik putih, daksina 1 soroh, jinahnia 5555. Pane hanyar muwah nasi ketengania nganut huriping pancawarna mwang punjungania padha 1, ring tengah suci 1 mwang sesayut durgemala, sesayut panca klud pamyak kala, dulurana pamangguh pamali.
Ring sanggar kamulania, suci 1 soroh den agenep.
Ri sang ngrajengin, suci 1. Ri telas pinuja salanlaning panglukatan pras lis tatimpug. daksina sang ngerajah nature, hartha 135, daksina sang ngrajah rwaning sarpasari, hartha 77.
Ri tlas pinuja de sang sadhaka kon sang adruwe caru tkeng pratisantanania kabeh ngabakti kasurya holih skar, ka sanggar kawitan, ring sang hyang resi Ghana hantuk sekar, mwah masaksi kasurya dening kwangi, tlas.
Wus mangkana raris lukat sang adruwe caru, tepung tawar buwuni, lisin, tirtanin, raris majaya-jaya sakawruhta. Wus mangkana, konon sang adruwe caru, ngayab caru.
Wus ngayab, raris gabungin layang – layange, rames nasin carune mancadesa, wadahin pane, pahidang laying – layange. Hider kiwa, sambehin nasi ramese mwang prayascita durgamalane saha sampat tulud mwang obor – obor, kulkul, sembaring triketuka, mantra dening tutulak agung mwang lis panglukatan, saha cengceng kendang kempul, dulurania surak awu, pangihid butha, nga.
Ri tlas mider kiwa ping 3, raris pendhem layang – layange ring gnahe macaru resi Ghana. Sesaning mapendhem, bwangen ring pempatan jalan, ring jurang, ring lawn wenang. Tlas.
Iki sang hyang resi Ghana, ma; om am resi Ghana bhyanamah. Om hana sira sang resi Ghana, rupania kadya liman, guna nirana kaya jaladhi sangha, matan ira dumilah, pancamahabhuta ring tengah, hangilangaken satru, kala traya, tuju tluh teranjana, kalukat den ira sang hyang resi ghana. Om sa ba ta a I na ma si wa ya. Om etat mantram prawaksyanam, Madhya om kara sang sthitah, ang kara purwa sang sthopi, aghneuesya dre narakah, si kara daksina jnyeyah, nairitya nghewa sang sthitah, tawat nakara pascima, bayon si kara sang sthitah. Naka rota rawi jnyeyah, ma kara saniya rewaca, tatah mantramnia widwan, ghanarsi nama raksane, dwija gni nayana bayu, guno wipre ndriyo nujah, pramondo rupa, resi candra resi catu. Om indah ta kita sang hyangresi ghana, tulung manusanira katibening marana agung, haweta urip manusanta, mwang dirghayusa. Om sidhiranstu ya namah swaha.
Iki CARU KAPUTUSAN SANG HYANG RESI GHANA, pamarisudhaning karang panes mwang sanggar, ngadengaken sanggar tutwan mapenjor pring gadhing, matunggul kasa 2, marajah ghana ngawa bajra 1, ngawa gadha 1, malih rwan bingin acarang, ring aersania gnahnia, kapwa rwania marajah cakra, magenah ring hareping sanggar, sucinia 2 gnep matumpang hadanan, pras daksina, hartania 1700, canang lengawangi buratwangi mungah ring sangar.
Mwah ring hareping sanggar, natarnia marajah padma asthadala, sastrania pur, SAM; da, BAM; pa, TAM; u, AM; ghne, YAM; ne, SIM; ba, WAM; ai, BAM; ma, MAM.
Raris gnahin caru resi ghanane, lwirnia; sega 9 punjung, wadahnia tamas agung mahaled don sarpasari, rinajah sowang – sowang; Om, ma; Am, pur; REM, ghne; SI, da; GHA, nai; NE, pa; BHYO, wa; NA, u; MAH, ae. Ikang sega tancebin sekar tunjung, sowang – sowang 9 katih. Iwaknia ithik ingolah den asangkep, nora majatah.
Carunia satha mancawarna, malayang – layang, winangun hurip matatakan sangkwi mikuh, dagingnia holah gnep, haywa korup, jajatah lembat hasem, calon agung mwang tumpengnia padha nganut hurip mancadesa, manceb sanggah cucuk 5, mancadesa gnahnia, makober mancawarna. Ring purwa, putih; daksina, bang; pascima, kuning; utara, ireng; ring madya, brumbun. Bantennia tumpeng danan. Ring tengah, daksina gede 1 harta 500. Bayuhnia padha ngawa panyeneng, sesayut pangambeyan, tawar, bahu, lis, tatebasan prayascita lewih 1, prayascita durgemala 1, pane hanyar 1, kuskusan 1, siwur pepek, tatimpug, sujang 5, madaging tuwak mentah harak berem. Ring panujan; suci 1 genep salanlaning panglukatan, daksina sang wiku hanuja, harta 1700.
Maka wnangnia caru ika ring pomahan, ring sanggar, ring parhyangan, dalem, desa, puseh bale agung mwang ring tegal, sawah, ring pangulun hempelan.
Kramania wus pinuja ikang caru, ngabakti ka surya hantuk skar mwang ring sang hyang resi ghana. Mwah kwangi pasaksi ka surya. Wus mangkana raris malukat sang adruwe caru, matirta majaya-jaya. Raris pendhem caru resi ghanane ring natar ring gnahemacaru, layang – layang bebek mwang hayam, gabungin nasi hider bwana, rames, wadahin pane hanyar, siratin tirtha. Panglukatan, pahidang ider kiwa ring pakarangan ping 3, saha hobor – hobor mwang sampat tulud, sembarin trikatuka. Mantrania pangihid bhuta saka wruhtawnang linakwan, tlas.
Nihan PENULAK MARANA MWANG TETEMPUR, karubuhan dhang-dhangan, kapanjing hamuk, kapanjing buron, sakalwiring durmanggala,
lwirnia: ngadagaken sanggar tutwan, munggah suci 2 soroh gnep salanlaning suci, tumpeng adanan, pras, rantasan sapradeg, tubungan putih ijo 7, bwah 7 mawadah limas, bungkak nyuh gading makasturi, canang langawangi buratwangi, daksina harta 1700. Sornia pagnen, malih magawe lahapan, banten munggah ring lahapan: bangkit asoroh, maguling bawi gnep salanlaning pabangkit kadi tingkahing madudus alit.
Carune ring natar, hayam mancawarna, malayang-layang winadah sengkwi mikuh, daginge holah, lwirnia: Hayam putih, daginge holah, maurab bang putih, jajatah lembat asem padha 5 katih, calon 5, dadi 5 bayuh, ring purwa gnahnia. Hayam biying, daginge holah, maurab bang putih, jajatah lembat asem padha 9 katih, calon 9, dadi 9 bayuh, ring daksina gnahnia. Hayam putih ayungan, daginge holah, maurab bang putih, jajatah lembat asem padha 7 katih, calon 7, dadi 7 bayuh, ring paschima gnahnia. Hayam ireng, daginge holah, maurab bang putih, jajatah lembat asem padha 4 katih, calon 4, dadi 4 bayuh, ring uttara gnahnia. Hayam brumbun, daginge holah, maurab bang putih, jajatah lembat asem padha 8 katih, calon 8, dadi 8 bayuh, ring madya gnahnia. Padha winadhahan sangkwi.
Mwah asu bang bungkem kang durung awawajang, malayang-layang, winadhahan sangkwi mikuh, daginge holah, urab bang putih, jajatahnia lembat asem padha 33 dadi 3 sengkwi, ulam karangan 1.
Mwang calon agung manut uriping paidheranmwang kakepuh takep-takepan.
Mwah sega punjungan putih habang kuning ireng brumbun padha ngawa pras pangambyan, tulung sesayut, mwah tumpeng hanut paideran 33, sega ketengan 33, naceb sanggah cucuk mancadesa gnahnia, munggah banten dandanan, canang sari canang gantal, sujang rempet 5, misi twak harak.
Carune ring tengah, suci 1 gnep selanlaning suci mwah prayascita lewih, prayascita dumanggala, sasayut panca klud, pamyak kala, mwang pamangguh pemali, lis sanggahurip padha ngawa, canang brekat (base silihasih) hamancadesa, rantasan mancawarna, kober mancawarna, carune sania 33 saha takep-takepan mwah dyun pere misi toya mancadesa, mesi alas-alasan agawu, tepung tawar pada ngawa, tetebus mwang rarakih.
Mwah ring punijan, suci 1 gnep selanlanging suci mwang panglukatan gnep sepakaraning panglukatan, samsam bija kuning, alas-alasan, sodha pras lis buhu sgawu, tepung tawar, sasari, tatebus mancawarna.
Iki CARU PANCA SANAK MADURGHA nga, wenang glarakna ring khayangan panghuluning setra. Mwah yan gentosin hasune antuk bawi butwan, CARU PANCA SANAK TAWUR MADYA nga. Wenang hanggen ring pura dalem. Caru iki sane kalih soroh padha tan wenang ngawa pabangkit adyapi pacang hanggen ngusaba ring sawah, wnang glarakna caru iki, kewala nasin carune mancadesa, sega punjungan hingangge maka tigang desa tiga, nganut warnan pahideran.
Yadnyan hanggen padudusan alit, wnang caru iki ingangge. Iki yan pacang mangge ring desa-desa, wenang nunas tirta pamuput caru ring dalem khayangan, panguluning setra. Yan mangge ring sawah, wenang nunas tirta pamuput caru ring bedugul panguluning sawah. Mangkana kramania.
Mantran asu bang bungkem, ma; pakulun sang hyang hulu kuda saking kidul, pahing pancawarna ira,iki asu bang bungkem rinancana, makadi saruntutan ipun, twak sagecha, bali saliyus, enak sira hamanga anginum, tkaning anak putu buyut ira, aja sira ngadhakaken bhaya pakewuh ring gaga, ring sawah, ring pomahan, ring pakarangan, tulaken kang sasab merana kabeh, om sidhirastu ya namah.
Caru madurgha, ma: pakulun kaki bhatara kala, paduka bhatari durgha, Ra kaki bhatara ghana, sang , pancamuka, sira hanyangkala hanyangkalani pakarangane pun ANU, apan sampun hangaturaken caruka bhayakala, amuktya sira, sama suka sira sang adrewe caru, dirgayusa yowanaweta hurip, tka waras 3x.
Ri wus pinuja, kon sang adruwe caru ngabakti ka surya, ka durgha dewi saha kwangi pesaksi. Wus mangkana bwangen tang caru mareng sagara, ring pempatan, jurang, ring lwah agung wnang.
Iki PAMUKTYAN CARU salwirnia, ma; pakulun ra nini bhatari durgha, manusa tanaya bhatari, kinengken paduka bhatara, hangaturi tadhah sajin ira samodhaya, manawi paduka bhatari kaget pakulun, apan pakulun bhatari hangaturi tadhah cari ring dena kamaranan, manusanira hangaturi tadah sajin ira, makadi balan ira samodhaya, nangang atau puluh, padha sira hangarepi tadhah sajin ira sowang-sowang, pilihana saka belan ira, hajaken rowan ira kabeh hamangan anginum, sing kirang sing luput, sampun tan wirati, hagung pangampuran ira, mangke ta ri huwus hamangan anginum, lunga ta sira kabeh, haja sira kari hingkene, ring pakarangan, ring pakubon, ring gagan, ring sawah, lungha sira maring bale agung, maring talutu agung, lungha sira maring parampatan agung, mulih ta ngko maring sangkanta, padha mulih ta ngko maring sangkanmu, yen ko hawali paksamu hala, mogha ko hakalung hususmu, kikilmu maka anting-antingmu, paparunmu maka kembanganmu, rudhiranmu pinaka bhasmanmu, klod kawuh pahunduranmu, batu lumbang palungguhanmu, haja ko kariha ring pakarangan, ring pakubonan, ring gaga sawah, hajaken wadokalan ira kabeh, haja kariha, yantuli jawalen, yan rumpuh gandhongen, yen wuta tuntunen, haja kariha ring kene, lah tka lungha 3x, om sarwa bhuta bhyonamah.
Iti PANGANTER CARU, ma; pukulun paduka bhatari durgha, bhatara ghana, sang yama raja, sang hudug basur, sang pulung, sang dengen, sang raksasa, sang wil, sang bhuta yoni sakti, mapupul ta sira kabeh, hajaken sarowang ira kabeh, iki tadhahan ira tan sopadin, haturane manusan ira sang akarya, hayo tan wirati, den sama suka, den sama sahiring, sang mamaweha kadirghayusan, sang akarya mwang sang amuja, luputa ring hila-hila, luputa ring jaya marana, sama hamanggiha suka rahayu. Om kala bhyo bhoktaye, om pisace bhyo bhoktaye, om sukam bhawantu, om purnam bhawantu swaha.
Iki MANTRAN SALWIRING CARU, wenang ruhunakna, haywa hinge, ma; pakulun mundura kaki sang gumulang gumulingeng lemah, mundura sira sang haneng lemah sangar, lemah mendek, mundura kaki pulung dharah, Manawa sira kedekan, kal ngkahan saka sanding, saka sampar, saka babad, saka lempang, saka pacul, kaki sira wong dhengen sanak, lunghana sira kidul kulon, kidul wetan, nggonan ira hagawaya griya hingkene, om kaki yama raja, kaki brahma raja, kaki banaspati raja, kaki dharma raja, hundurakna balan ira kabeh, kaki wong dengen sanak, sira rahuh hireku, sira sanake riku, ingsun hasanakeng sira.
Rahasya temen mantra iki, deniyan pinaka pangruhunakna. Tlas.
…………….>>> BERSAMBUNG
